നാടകപ്രവര്‍ത്തകന്‍ ഡോ. രാമചന്ദ്രന്‍ മൊകേരി അന്തരിച്ചു
കോഴിക്കോട്
പ്രമുഖ നാടകകാരനും സ്‌കൂള്‍ ഓഫ് ഡ്രാമ മുന്‍ ഡയറക്ടറുമായ ഡോ. രാമചന്ദ്രന്‍ മൊകേരി അന്തരിച്ചു. 75 വയസായിരുന്നു. അര്‍ബുദബാധയെ തുടര്‍ന്ന് കോഴിക്കോട്ടെ സ്വകാര്യ ആശുപത്രിയിലായിരുന്നു അന്ത്യം. ഇന്ന് ഉച്ചയ്ക്ക് 12 വരെ കോഴിക്കോട് ടൗണ്‍ ഹാളില്‍ പൊതുദര്‍ശനത്തിന് വെയ്ക്കും. ഏകാംഗ നാടകത്തിന്റെയും തെരുവുനാടകത്തിന്റെയും പ്രയോക്താക്കളില്‍ ഒരാളായിരുന്നു ഡോ. മൊകേരി. കോഴിക്കോട് ഗുരുവായൂരപ്പന്‍ കോളേജ്, കാലിക്കറ്റ് സര്‍വ്വകലാശാല എന്നിവിടങ്ങളില്‍ ഇംഗ്ലിഷ് അധ്യാപകനായിരുന്നു. ഷേക്‌സ്പിയര്‍ നാടകങ്ങളിലാണ് ഗവേഷണ ബിരുദം നേടിയത്. കോഴിക്കോട് സര്‍വകലാശാലയുടെ കീഴില്‍ തൃശൂരുള്ള സ്‌കൂള്‍ ഓഫ് ഡ്രാമയുടെ ഡയറക്ടറായിരുന്നു. ജോണ്‍ എബ്രഹാമിന്റെ ‘അമ്മ അറിയാന്‍’, ചിന്ത രവി സംവിധാനം ചെയ്ത ഒരേ തൂവല്‍ പക്ഷികള്‍, ജയിംസ് ജോസഫിന്റെ ഗലീലിയോ, പിക്സേലിയ തുടങ്ങിയ എന്നീ സിനിമകളില്‍ അഭിനയിച്ചിട്ടുണ്ട്. നടന്‍ നരേന്ദ്രപ്രസാദിനൊപ്പം ഗലീലിയൊ നാടകത്തിലും പ്രധാന വേഷം കൈകാര്യം ചെയ്തിട്ടുണ്ട്. ചിഹ്നഭിന്നം, തെണ്ടിക്കൂത്ത്, എന്നീ കൃതികളുടെ കര്‍ത്താവാണ്. കെ.വി.ഗോവിന്ദന്റെയും ദേവകിയുടെയും മകനായി 1947ല്‍ പാനൂര്‍ മൊകേരിയില്‍ ജനിച്ചു. ഭാര്യ: ഉഷ(റിട്ട. അധ്യാപിക, മക്കള്‍; മനു(ഐ.ടി. എഞ്ചിനിയര്‍, സിംഗപ്പൂര്‍), ജോണ്‍സ് (ബിസിനസ്)